Бұл мақала 371 рет оқылды, 1 рет бүгін

Жақында біздің облысқа Премьер-министр Кәрім Мәсімов келіп кетті. Жергілікті телеарналар мен әкімшіліктің газеттерінде Кәрім Мәсімовтың сапарының басты мақсаты Президенттің биылғы жолдауын халыққа түсіндіру екені айтылып жатты. Президент өз жолдауын аяқтай салсысымен осы Талдықорғандағы бұқаралық ақпарат құралдары қолдауды сол мезетінде бастап кеткен еді ғой. Ендеше, бізге жолдауды ұғындыру үшін премьер-министрдің өзі келгені несі? Әлде талдықорғандықтарды жолдауды түсінбейді дейді ме екен?  Дегенмен менің айтпағым бұл емес.

Мәсімов келеді деген сәттен бастап біздің университеттің студенттерін жинап даурықпа шараға дайындай бастады. «Генеральная репитицияда» біз ғана емес, бюджеттік қызметкерлер де жүрді. Айтып айтпай не керек, қызықтың бәрі көптен күткен Үкімет басшысының келген күні болды. Бізді жергілікті «Өркен» кешеніне екі сағат бұрын алып келді. Бюджеттік қызметкерлер мен студенттерді қойыңызшы, бұндайға етіміз үйреніп кеткен ғой. Екінші қабаттағы орындарға соғыс ардагерлері мен қарт әжейлердің мойындарына «Нұр Отанның» шарфттарын орап жайғастырып қойыпты. Әркімнің өзі орны бар. Басына каска киген құрылысшылар ортада, студент жастар да ортада, арт жағымызда қала тұрғындары. Қолымызға «Тек қана алға!», «Жолдауға  қолдау» деген жазулар бар тақталарды ұстатып қойып, дайындыққа кірісті. Облыстық ішкі саясат басқармасының бастығы Г.Сүлейменова: «Кәрім Мәсімовтің сөзінен кейін «Қазақстан, Нұрсұлтан, «Нұр Отан», ал партия төрағасының бірінші орынбасары Нұрлан Нығматуллиннің сөзінен соң «Қазақстан, Нұрсұлтан, «Жас Отан» деп айғайлайсыңдар» деп бұйрық етті. Дайындық барысында айғайлаушылардың дауыстары дұрыс шықпады ма, әкімнің бірінші орынбасары Батталов мырза «немене үш ай бойы жалақы алмаған адамдар құсап тұрсыңдар» деп жасы бар, жасамысы бар жиналғандарға бір-ақ зекіп тастады. «Мұндай қолпаштау тек қана Павлодар, Ақтөбе облыстарында болды, біз солардан қалуымыз керек пе? Тем более, Елбасы біздің облыста дүниеге келді» деді белсенді болып жүрген  Г.Сүлейменова ханым. Бұл не деген масқаралық, не деген жағымпаздық? Жағымпаздықтың да эстафетаға айналғаны ма? Біздің облыстағы жағымпаздықты көріп ертең басқа облыстар да асып түсуге тырысары сөзсіз. Ендеше «лаула, лаула жағымпаздық алауы!» дейміз бе, қайтеміз?

Шыны керек, Премьердің 20 минут аялдауына екі сағат аяғынан тік тұрған үлкен кісілерді аядым. Ал шаш ал десе бас алатын шолақ белсенділер қарттарға пысқырып та қарамай, Астанадан келген ақ жағалылардың алдында құрдай жорғалаумен болды. Жиыннан соң бізді керек қылған ешкім де жоқ…

А.РАХМЕТ.

(Суреттің мақалаға қатысы жоқ).